اطلع غزليات

سوف نحاول في هذا الموضوع ادراج بعض الطلع الغزليات-اي تتغزل بالمرأة-..وكٌيفان ايضا والكثير منها مشهور..

خالكٌ حد اشوين واكحل ...طَرّاش وكمّاش
وافيْسَد واحْريص واوْحَل..فيه الناس أمْنْ آش

خالكٌ حد الى تْكٌرّح ...تفرح لو لخلاكٌ
واللي نيثي ما تفرّح يعطيها لخناكٌ

كٌولي لي راجل جاك..
شي يْدَوّر هو ذاك
انتيَ مانك هاك ......امرا كٌم اسمينة
واوعر من شي مرياك..وادْخيْنة واشوينة
وارويصك لمْشَكرَد..حدّو لك لوذينة
وافيمك كل ابلد ...منو فيه اسْنينة

راصك ياغلى فيدات النيل
ماجا من عند الراص اطويل
وكلامك خاسر واكٌلَييل....واتّوْتي تحصيل الحاصل
غير الا ياسبّت لكتيل ...يكٌطع بابليس اثرو فاصل
فامنادم راصو ماهْ اطويل..واكلامو ماهو متفاصل

اجرب ذا اللي لي نطْرَب
واكٌصَيّر راصو ومْخرّب
ويْتَوْتي من فظلك يا الرب...وانا زاهي لي تخراصو
يا اللالي مافلَح حد اجرب...ويْتوْتي واكٌصيّر راصو

أخوكم بنصالح محمد

تحية بعبق الشعر الممتد من المحيط الى الخليج على حد قول شاعر المليون محمد ول الطالب .
الغزل كغرض ابان خلاله الشعراء عن رق الكلم في حسن سبك تمجيدا وتغزلا بالمراة .
ملاحظة بن صالح في التفلويت
ارويسك لمشكرد نسيت الدال اعرف ان السرعة في الكتابة هي......
ساورد بعض من قصائد الغزل التي اتذكرها .
شفت لمنها مزهود.......مع لغيود اكعود
بيا خوف المردود......اكعدت الهيه فزر
بعيني يا لمعبود.......ماني كادر نخزر
لوغرظي فم نعود.....ابعيني من زر
2
ذيك انختير انفاتني........مذكوره نزلت فوتني
والى نزلت عسراتني....والى عسراتني اتفوتني
والى فاتتني فاتني........شي ما نبغيه افوتني
3
بيا محزمها كل مخ.......حرمتوواللي تحت لخ
محزمها ذا نبت ذلخ.....هجفا من تحت اعكونها
ظحكتها ماهي وخ وخ ......تتبسم من مكنونها
والرقبة فرسخ ما تبخ .....الريق اعلى عبونها
والمقفا فم اللا ايلخ.......فلكة حوت ما دونها
منعزله واصل انديهدبخ...واندخ ادبيه اوبيونها
لكمامة سودة تنسلخ........منها يابا وجفونها
دخو يا غير اللا لدخ.......منهم فلدخ اخونها
شكرا اخي بن صالح ولواني اصبحت افتقدك كثيرا في المنتدى

كم كنت أنتظر منك شيئا أخي بنصالح فقد أصبحت ترد فقط على المواضيع و قد كنت سأشترط عليك لكي أسامحك على سوء الظن بي في موضوع العرس الصحراوي بأن تتحفنا بطلعة تكون من انتاجك أو قصيدة ما شكرا على التفلويت الرائعة و لك مني هدا الكاف:
كالولي نحلف فالكامل ....عني ما نقرب خيمتها
و الكامل في متكامل ....كد حروف من عزتها

المسامح كريم..هكذا سوف اقول للاخت الخالة..واتعود املي لخلاكٌات صافية...وذا اللي ندَورو كاملين فالمنتدى..
الخليل ...انا راني زوّزتها عليك...انت ادكٌدكٌ راصك...ماتليت تفصل بين الغزل وشي ثاني...
الطلعة التي اوردت...بيا محزمها كل مخ...ماني لاهي نكٌد انكافيك اعليها...عاد لي زمن انلوّد الها وجات من عندك..ومشكور اعلى ذا...الطلعة كٌط اسمعتها في اذاعة العيون مرة ...ورانك تعرفها ذي لذاعة ...ماهو هول ولاهو اغنا...واعيات الين يهبو عليها ارياح خطيرة من نعرف من امنين جايات..ويجيبو معاهم لغنا..
الطلعة انا بعض الكلمات ما كٌديت نكٌراهم...
منعزله واصل انديهدبخ...واندخ ادبيه اوبيونها
محزمها ذا نبت ذلخ...
خيك بنصالح محمد

طلعة من الانتاج الخاص
اخلاكٌي عادت هالكة...اش بيها يا ليخليها
بيها ليعات السالكة.....الا ذاك اللي بيها
بيّ ذا السغم وذا الحَرّ
العادو باطل كرّ كرّ
اعلى لخلاكٌ ومنشفر....عادم وسيلة بيها
مولات احزيمي تنجبر...ويعود اجد اعليها
نبغيها ماهي كٌاع سرّ...والله الا نبغيها

ربما قد يلاحظ المتصفح شئ في الطلعة...وخاصة الروي..فهل من شفيع
بنصالح محمد

بن صالح ربما لست وحدي من يعاني السقم والهيام الحمد لله اني وجدت من يقاسمني الليعات .
اخلاقك ماهي سالكة .....انت عارف ذاك لبيها
بيها ليعات السالكة .....من متن الليعة تفشيها.
جميل حتى انك استطعت اختيار روي رنان يخدم الغرض كر كر سر مر حر كلمات تدل على المعانات .
اه على فكرة طلعة لخ بخ اظن انها لم تعد تحتاج تفسير

بسم الله الرحمن الرحيم .
أخي بنصالح ما ني لاهي نكول لك كون مانشاء اللهو يا مولانا على ذا الغنا الزين و المصكول ، خصوصا منين كلت :
اخلاكٌي عادت هالكة...اش بيها يا ليخليها
بيها ليعات السالكة.....الا ذاك اللي بيها
يغير مسولك يكان السالكة كطت سمعت ذي الطلعة و ألا أبداي ؟؟؟
مسلة ثانية منين لحكت مسابقة المداحين . الناس راهم يدورو يسمعو منكم شي ؟؟؟

شكرا الخليل على الكٌاف ...اللخ الا خليه ف جانبة ماهي ذي اللي نحنا فيها...والطلعة مفهومة وشكرا لك...
وليعاتك ماهم كيف ليعاتي...والعذري العفيف اراهو لك من اخطرهم...الله يحفظ..
موما انت تسول كان كٌط سمعت السالكة ذي الطلعة...احممممممممم احممممممممم..شوي هاك..وعلى عجلة..
بوسافن اراهي وجهت نداء ..ونكٌولو ..ياويل امك يا المتوخر...انا بعد مانحاني ماهو الاعلان عن النتائج الى عادو ياسرمن المشاركين...ونتمناو ذاك...سول عنك الخليل كانو وجّد شي
بنصالح محمد

انهنوك يا سيد احمد -سودح-..ويعملها امباركة وعْكٌيدة..مبروك ..ونهنو حمدي ول احمد ول السي الطيب وعقيلته تسلم منت عبد الخالق ول السي الحمدان-نينها البوعيطاوي-على المولود ...ولحكٌ لو السلام.. وأرانا انحانو تنادونا في العقيقة..
ايمان وآسية ما يلتحكٌو...والسالكة يعملها هالكة ماتغيّر حد افيلح...
الخليل كٌال عنو استكهل ...ولاهي يلود الا لكهلة من ذوك الكهلات..
ايوا راعي لك شوي هون ..نتمنى ان ينال اعجابك..
آسيّة وايمان الى زاد
كٌبظو باطل نصرْتْ لقياد
وعادت فينا منهم لوجاد......علينا والحزم علينا
يشتدو وهذا ماهْ امكٌاد.........يغير الله لا يبلينا
تخلينا ليعات آسيّة.........وايمان املي تخلينا
ومنين انذكرت سُمية.........أصل اخلينا و اذرينا
واراني طالب منك الاذن بادراج طلعة اسية وايمان..بعد اذنك...
والخليل الا زَيّرو باش يكٌول طلع على امناتك ..اراهو صناجة العرب...وما يتغزل بطفلة ماجاو الخطّاب كرّكرّ.. اما انا اراني العكٌ من حب لحميس...منين يسمعو غزلي يهربو...ايوا ايدك لو...عبد الله موما ماااااااااانعرف...
انت ما ناديتنا الخير علاه...ولا كٌلت لنا شي...
بنصالح محمد

بن صالح انت تتغزل بلحيمة مزالت فلحوالة ههههههه هذا زاد ياسر ايو اللا اسمع يا اسودح محمد قطعا واكل لحم النعاج .ومشرتت ايدور اللا العقيقة .
ايو ذا كاف اللا في التهاني ماه فلغزل .
تهانينا لسودح تنكال .....انزدنا ونزادت فينا
سمية وانزادو لخوال.......وانا مني تهانينا.
تارزيفت يا لخال ماهي فالعقيقة حتى انو المجتمع عاد اعيب مشي الراجل شوره وليمة العقيقة .يا غير بعد الله اخليك لها وتربى فعزك الين انجوك خطاب واللا مانك باغي شويباني هههههههه تم اوما علينا يمودخالاتك الدولامية .

ياخيي انت شفت عن الناثي مايرزفهم حد..مسيكينات...والاّ اخير مايرتزفو..
أراهم الا نوايل يطيحو على امنادم ويدمغوه...أمال حمدي رانا نحانو...يا الخليل ولدة ما انتكَل فاسمها ماهي ولدة...
انا بعد يا الخليل الا راني لاهي نعكٌد فيها خويط غليظ حتى ما ينكٌطع...
هنيئا سيد احمد-سودح- رانك انزدت بياسر..والشعراء اتبارك الله تغزلو بمنتك..وليد حمدي مانّا كٌيلين فيه شاي..الغزل الا فالطافيلات لفيلحات كيف سمية...
خوك بنصالح محمد

وكتنك اعقدت اخويط ذيك الص عادت الغيرة انت اللا سمعتني جاي خاطب .
خالك واحد فزمن ماضي كان فنواله يشوي شى من اللحم وافشاي .ايو كانت اطفيلة اصغيرة تزكنن بيه ادور اشوي .
كام وشوط لها فرسن كيفت شى ماه مستهم بيها وكال لها هاكي اقصر عمرك ورطيني حتى مانك لاهي تعودي مولات خيمتي ايوا دار الزمن ودار المدار .لين سب مولانا جاها خاطب وقبلت بيه الى ليلة الدخلة شوطت فرسن واعطاتو لو وجا عارف عنها ذيك الطفيلة اللي ...حتى بن صالح اعقد اشريويطة فكراع سمية وهاذي عادة جميلة نساجل بها الامهات من بني العمومة قصد الفكاهة ولما لا الخطبة .

الخليل ..انت حاجل لك عني لاحكٌ من التمحلي الين نشوّط فرسن ونعطيه لسمية...والله الا لخزيْو..ارهي خالة يا الخليل...نعكٌد فيها شريويطة..ونشري لها دانون والحلوى...
خالك اطفيل كان عند جيرانهم اف خيمتهم...وكان داير ايديه ضامّ بيهم الركيزة ..مدّت لو مولاة الخيمة شي من لكٌلية..وكٌالت كوم هذا الى عدت اتكٌد اتكٌوّم شي ..المهم الطفيل افركٌ ايديه وانكبّ ياسر من لكٌلية ومرّبيها شور امو ..مضى وقت وزمن ..وجا الطفل هذا يخطب من عند هذي لمرا...وجاب الها لكٌلية هذيك اللي امتدت لو من ايدها...يغير هذا الطفل اراهو ادْرَيْس وعندو كهلة تبارك الله...
سمية ايطول عمرها الغزل ينكٌال فيها مانبغيه...ولحمة ماتغير ماهي لحمة حرّة..
بنصالح محمد

مرحبة اسودح ذيك ماهي فاكتك من الزردة هههههه.
وازين من ذاك طلعة محمد سرتك وسرتي عنك اللا محبوكة من شي حك والله ايخليهم لك ويجعلهم ذرية صالحة ......الين انجوا خطاب

مشكور سيد احمد على تبليغ السلام ..وانا اعرف انك مانك من ذوك اللي ما يلحكٌو لمانة...
المهدي ولد الداه أراهو انويشط والا بارك اعلينا بالبُونْية... خليتو ذرك فالدار..
الطلعة ماني شاكرك اعليها ..عاكٌب كٌولي لها مركٌت ايدي وعادت الا لايمان وآسية ..واللي كامل يبغي يحفظ لغنا-يْسَرْويه-..الله يبارك ..
والخليل اراهو مزال يْحاني لمعيطة...ايوا شوف اش تعدّل معاه أراهو يبان متشرتت حتى.
بنصالح محمد